പാകമാവാത്ത കവിത

കിട്ടിയ ആശയമെടുത്ത്‌ അടുപ്പിൽ വച്ചു
അക്ഷരങ്ങൾ പെറുക്കി അതിലിട്ടു
വൃത്തം അലങ്കാരം പ്രാസം അങ്ങനെ കണ്ടതൊക്കെ
പാകം നോക്കാതെയിട്ടു
...
പ്രതീക്ഷ കൊണ്ട് മൂടി കാവലിരുന്നു ,
തിളച്ച് മറിഞ്ഞ് വെന്ത് ഒത്ത ഒരു കവിതയാവുന്നതും നോക്കി .

ആദ്യം കൂട്ടുകാർക്ക് വിളംബാം
അത് കഴിഞ്ഞ് ചൂടാറും മുന്പേ ഗ്രൂപ്പുകളിൽ എത്തിക്കണം
കിട്ടുന്ന ലൈക്കും കമന്റും കണ്ട് ഒന്ന് സ്വയം മറക്കണം
അനുവാദമില്ലാതെ ആരേലും ഷെയർ ചെയ്തത് കണ്ടാൽ
പിന്നാലെ ചെന്ന് കുത്തിനു പിടിക്കണം

പതിവ് സമയം കഴിഞ്ഞിട്ടും സംഗതി പാകമായില്ല
വെപ്രാളത്തിൽ തീ കത്തിക്കാൻ ഭാവന മറന്ന് പോയിരുന്നത്രേ
കഷ്ടം അല്ലാതെന്ത് പറയാൻ !

-------കവിത ----08 .01 .2014